850 Beem sinn an de leschten zwee Joer zur Kompensatioun frësch ugeplanzt ginn

Kompensatiounsmoossnamen, wann e Bam, dee laanscht enger Strooss steet, gefält gëtt, mussen och do gräifen. Dat erklären de Minister fir bannenzegt Sécherheet, Etienne Schneider (LSAP), an de Minister fir nohalteg Entwécklung an Infrastrukturen, François Bausch (déi gréng), an enger Äntwert op déi parlamentaresch Ufro vum André Bauler (DP).

Gäre gëtt jo vun de Beem geschwat, wann et ëm Verkéiersdoudeger geet. Dobäi maachen déi nëmmen e klengen Deel aus: op 25 Verkéiersdoudeger kommen 2017 der 7, déi widder e Bam geknuppt ginn.

D’Beem einfach ewech ze maachen ass dobäi net esou einfach, gëllen d’Alleeën als kulturelle Patrimoine a stinn och deelweis ënner Naturschutz. Do wou Beem laanscht d’Strooss gefält ginn, mussen der och Neier laanscht Strooss geplanzt ginn. Dëst gëllt och fir Beem, déi op geféierleche Plaze stinn. D’Ponts et Chaussée géif dobäi Suerg droen, datt déi richteg Distanz zur Strooss bei der Neiuplanzung fonnt géif ginn, esou d’Ministeren.

Och d’Leitplanke ginn ausgebaut

850 Beem sinn esou an der leschten zwou Saisonen 2016 an 2017 ugeplanzt ginn. Dës Zuel stëmmt fir de ganzen Territoire vum Grand-Duché a limitéiert sech net op Beem, déi laanscht d’Strooss geplanzt gi sinn.

Fir d’Sécherheet ze erhéijen, ginn dofir och méi Leitplanke gebaut. 2017 waren dat, laut de Ministeren, 10.850 Meter. 3,5 Kilometer dovunner déngen och der Sécherung vun dëse Beem. Fir 2018 sollen 8 Kilometer dobäi kommen, 16 Kilometer sinn nach weider a Planung.