Covid-19-Gesetzer: Op wat muss een elo oppassen?

Mat den zwee Covid-19-Gesetzer (7606 a 7607) huet een de juristesche Kader bestëmmt, deen nom Enn vum État de Crise gëllen soll. Um Mëtternuecht ass dësen ofgelaf. Déi nei Gesetzer dréien dobäi ëm Versammlunge vu Gruppen, d’Ëmsetzung vun de Schutzmoossnamen (Schutzmask an Sécherheetsofstand), sou wéi d’Identifikatioun, de Suivi an eng schnell Isolatioun vun infizéierte Persounen, respektiv deenen, déi am Verdacht stinn erkrankt ze sinn.

Esou appelléiert d’Gesondheetsministesch Paulette Lenert elo och un de gesonde Mënscheverstand: „Sou laang et nach keng effikass Medikamenter géint d’Krankheet Covid-19 oder een Impfstoff géint de Virus SARS-CoV-2 gëtt, deen d’Krankheet ausléist, sinn dëst déi effikasst Moossnamen fir géint d’Epidemie unzekämpfen. Andeems ee responsabel handelt dréit jiddwereen dozou bäi, d’Ausbreedung vum Virus ze verhënneren an eng zweet Wëll ze vermeiden.“

© Chambre des Députés

Un dës Schutzmoossnamen musst Dir Iech halen

D’Schutzmask ass obligatoresch fir:

• D’Notzer vum ëffentlechen Transport (Bus, Zuch, Tram…), woubäi de Buschauffer elo och ouni Mask fueren dierf, wann eng interpersonell Distanz vun zwee Meter ka respektéiert ginn, respektiv ee Panneau de Chauffer vun de Passagéier trennt;
• Aktivitéiten, déi e puer Leit méi unzéien: Geschäfter, Guicheten, kulturell Evenementer,…

Ausgeschloss vun dësen Obligatioune sinn:

• Kanner ënnert 6 Joer;
• Jonker ënnert 13 Joer, déi sech dobaussen ophalen;
• Persoune mat Handicap, déi ee medezinesche Zertifikat bei sech droen, déi d’Ausnam zouléisst an déi sech un déi sanitär Moossnamen halen;
• Acteuren aus dem kulturellen a sportleche Beräich, wärenddeem d’Aktivitéit ausgeüübt gëtt.

Zur sozialer Distanz an der Schutzmask:

• Versammlunge vu méi wéi 20 Persounen am Banneraum oder dobaussen si just autoriséiert, wann Sëtzplaze garantéiert ginn an esou d’Distanz vun zwee Meter kann agehale ginn, respektiv d’Schutzmask ugedoe gëtt;
• Am private Raum recommandéiert de Gesondheetsministère, datt bei Versammlungen d’Distanz gehale gëtt, oder Schutzmasken ugedoe ginn;
• D’Obligatioun, datt ee sech bei gréisseren Evenementer sëtze muss, trëfft net op d’Fräiheet fir ze manifestéieren an och net op Begriefnisser dobaussen zou. D’Droe vun enger Mask bleift awer eng Obligatioun, wann déi noutwenneg Distanz tëscht de Leit net kann agehale ginn;
• Bei Foiren, Salonen a Mäert muss eng Schutzmasken zu all Moment souwuel vum Aussteller, wéi och vum Visiteur gedroe ginn, wann d’Distanz vun zwee Meter net respektéiert ka ginn.

Spezifesch Moossnamen fir Restaurant, Wellness a Co.:

• Restauranten, Kiosken, d’Iesssäll beim Hebergement, Kantinnen an all aner Plaze vun der Restauratioun musse sech u Folgendes halen:
  • De Client gëtt just zerwéiert, wann e sëtzt;
  • Op all Dësch dierf just e Maximum vun 10 Persoune sëtzen, ausser si sinn aus dem selwechten Haushalt;
  • D’Dëscher mussen op mannst 1,5 Meter auserneen stoen, oder duerch ee Panneau getrennt sinn;
  • D’Droe vun der Mask ass obligatoresch fir de Client, soubal en vum Dësch opsteet;
  • D’Droe vun der Mask ass obligatoresch fir d’Personal beim direkte Kontakt mam Client;
  • Spéitstens um Mëtternuecht muss den Trottoir eropgeklappt ginn
• Am Wellness (Sauna, Hammam, asw.) dierf just eng Persoun, oder méi Persounen aus dem selwechten Haushalt sinn;
• Beim Sport ass de physesche Kontakt verbueden (ausser fir Elitesportler, de Sportslycée a bei Kompetitiounen);
• Och bei kulturellen Aktivitéiten ass physesche Kontakt verbueden, ausser bei professionellen Acteuren vum Theater a Film, sou wéi bei professionellen Dänzer. Si mussen awer déi sanitär Reegelen zur Preventioun (Desinfektioun,…) anhalen.

Folgend Aktivitéite si verbueden:

• Foiren a Salonen, ausser si ginn dobaussen organiséiert;
• Disko.

Dës Verbueter goufen erstallt, wëll si wuel een erhéichte Risiko zur Kontaminatioun opweisen, respektiv kann d’Distanz net agehale ginn.

© prostooleh / Freepik

Wéi war dat mat der Zwangshospitaliséierung?

Ass een infizéiert, da muss een dem Direkter vun der Santé verschidden Informatiounen zum Gesondheetszoustand an zur Identitéit vun de Persounen, mat deenen een 48 Stonnen virdrun a Kontakt war, uginn. Och déi Responsabel vu n organiséierte Reesen (kollektiven Transport vu Persounen), d’Responsabel vu Spideeler, vum Hebergement oder der Fleeg kënnen op Demande befrot ginn.

D’Donnéeën ginn natierlech konform dem Dateschutz behandelt, ginn uschléissend anonymiséiert an 3 Méint gespäichert.

Weist eng Persoun, op medezineschem Uerder, een erhéichte Risiko op, fir aner Persounen unzestiechen, kann d’Santé a Form vun enger Ordonnance verschidde Moossnamen treffen:

• Quarantaine Doheem fir 7 Deeg, mat Areeche vun engem Erkennungstest ab dem 5. Dag. Widdersetzt ee sech dem Test, da muss ee maximal weider 7 Deeg a Quarantaine bleiwen.
• Isolatioun Doheem, mam Verbuet erauszegoen wärend 2 Wochen. Fält den Test op Covid-19 positiv aus, kann d’Isolatioun nach zwee Mol verlängert ginn.

Concernéiert Persoune mussen een Zertifikat areechen, datt si net schaffen, respektiv an d’Schoul goe kënnen. Beim Verwaltungsgeriicht kann ee sech bis spéitstens 3 Deeg no der Benoriichtegung géint d’Ordonnance vun der Santé wieren.

Wien en erhéichte Risiko fir d’Gesondheet vun aneren opweist, sech awer géint d’Quarantaine oder d’Isolatioun wiert, dee kann zwangshospitaliséiert ginn, respektiv vun enger anerer gläichgestallter Struktur zwangsisoléiert ginn. D’Zäit beleeft sech dobäi op d’Dauer, déi laut Ordonnance nach ofzesetzen ass. Ass een op dësem Punkt ukomm, muss ee sech un immens strikt Konditiounen halen, déi am Artikel 6 vum Gesetz zu de physesche Persounen festgehale sinn.

Déi zwee Gesetzer gëllen fir ee Mount a kënnen zu all Ament ugepasst ginn, wann et dann néideg ass. All Ännerung muss duerch eng Chambersitzung diskutéiert ginn. Am Verglach zu eise belschen Noperen, si mir do jo gutt organiséiert.

Weider Informatioune ginn et ënnert www.covid19.lu an www.sante.lu.

Opmaacherbild: © Freepik