Ab e Méindeg dierf een dem Groussherzog Jean am Palais eng lescht Éier erweisen

vun Moien Redaktioun den 26/04/2019

Ab e Méindeg dierf een dem Groussherzog Jean am Palais eng lescht Éier erweisen

De Marechalat vum Haff huet an engem Communiqué doriwwer informéiert, dat de Sarg mam Groussherzog Jean, e Sonndeg vum Schlass zu Kolmer-Bierg an de Palais zu Lëtzebuerg iwwerfouert gëtt. Den Depart ass zu Bierg ëm 14 Auer, an de Konvoi sollt géint 15 Auer beim Palais ukommen.

De Läichnam vum Groussherzog Jean gëtt uschléissend am groussherzogleche Palais opgeboert an de Public, deen eisem Monarch eng lescht Éier erweise wëll, kann dat zu festgeluechten Zäiten och maachen:

e Méindeg 29. Abrëll vu 14 bis 19 Auer;
en Dënschdeg 30. Abrëll vun 10 bis 12, a vu 14 bis 19 Auer;
e Mëttwoch 1. Mee vun 10 bis 19 Auer;
en Donneschdeg 2. Mee vun 10 bis 12, a vu 14 bis 19 Auer;
e Freideg 3. Mee vun 10 bis 12, a vu 14 bis 16 Auer.

Et ass och e Kondolenzbuch fir de Public virgesinn. Dat beim Wuechtposte vum Schlass zu Bierg, an dem Schlass zu Fëschbech. Am Palais zu Lëtzebuerg ass kee Buch virgesinn, mee wie wëll ka säi Schreiwes an eng dofir preparéiert Urn deposéieren.

De Marechalat weist drop hin, datt aus Sécherheetsgrënn Verschiddenes ze berécksiichtegen ass: Pochen, Fotoapparater a Kameraen dierfen net mat an de Palais.

Houmass e Samschdeg 4. Mee

Déi groussherzoglech Koppel hunn de Wonsch ausgedréckt, datt de Public dierf un der Mass an der Kathedral deelhuelen. D‘Zeremonie ass de 4. Mee um 11 Auer. Wien dann um Gottesdéngscht wëll deelhuelen, muss sech aschreiwen, wëll d‘Zuel vun de Plaze begrenzt ass.

Zu dësem Zweck ass eng Telefonsnummer (474 874 810) ageriicht ginn, an och op der Internetsäit vum Haff www.monarchie.lu kann ee sech am Méindeg 9 Auer androen. Uecht gedoen: et kënne pro Aschreiwung nëmmen 2 Plaze vergi ginn! (Wan dës validéiert ginn ass).

Wien dës Hürd gepackt huet, muss iert hien dierf an d‘Kathedral eran, sech e Samschdegmueren als éischt am Groussen Theater zu Lëtzebuerg (géintiwwer dem Glacis) enger Sécherheetskontroll ënnerzéien. Hei erhält een dann och säi „Laissez-Passer“.

Den Transport vum Theater zur Kathedral (an och de Retour dohinner) gëtt mat Navette gemaach.