De Marvel Cinematic Universe, erkläert

vun Sven Wohl den 04/06/2017

Ween och nëmmen geleeëntlech e Bléck op de Kinosprogramm werft, dee stellt fest, datt do vill Superheldefilmer um Plang stinn. Do den Iwwerbléck ze halen oder iwwerhaapt ze verstoen, wourëm et geet, kann eng Erausfuerderung sinn. Mee kee Problem, mir sinn hei, fir dat ze erkläeren.

Ween ass Marvel?

Marvel ass ee vun de gréissten Comic-Produzenten op der Welt. Hinnen gehéieren Spiderman, Iron Man, Hulk, Thor an eng sëllechen aner Kreatiounen. D‘Firma besteet säit 1939 a gouf 2009 vun Disney kaaft.

Wat hunn se am Kino geleescht?

Am Géigesaz zum Konkurrent DC (Detective Comics) war et längert Zäit roueg ëm d‘Marvel Helden, wann et ëm Asätz am Kino goung. Abseits vun engem Serial-Film zu Captain America am Joer 1944 huet et bis 1986 gedauert, bis Hollywood sech erëm un e Stoff vun hinnen erugetraut huet. „Howard the Duck“ gouf vu kengem geréngeren wéi dem George Lucas a LucasArts verfilmt… an ass brachial gefloppt. Och Verfilmunge vum Punisher (1989) an Captain America (1990) konnten net iwwerzeegen.

Wéini koum den Erfolleg?

Déi éischt erfollegräich Verfilmungen waren Blade (1998), X-Men (2000) an Spider-Man (2002). Do kéint een jo elo dovunner ausgoen, datt Marvel sech driwwer gefreet hätt, mee dat war leider net de Fall: All des Filmer goufen net vun hinne selwer produzéiert an hir Gewënnbedeelegung war minimal.

Wat huet sech geännert?

Marvel huet en eegene Studio, „Marvel Sudios“ gegrënnt, wou eege Filmer produzéiert sollte ginn. Zwar gëtt et dës Initiativ schonn säit 1993, mee eréischt 2008 koum mat Iron Man den éischten selwer gedréinte Film eraus.

De Marvel Cinematic Universe

Marvel’s Captain America: Civil War..Iron Man/Tony Stark (Robert Downey Jr.)..Photo Credit: Film Frame..© Marvel 2016

De Startschoss vum Cinematic Universe fällt um Schluss vum Film, wou de Personnage vum Nick Fury den Tony Stark op d‘Avengers Initiativ uschwätzt, an domadder op e gréisseren Universum hindeit. Tatsächlech sollten Iron Man, Thor, Captain America an Hulk net nëmmen an hiren eegene Filmer, mee spéider zesummen an „The Avengers“ optrieden. All Film huet säin eegent Puzzle-Stéck zur Handlung bäigedroen. No dësem Schema fiert den Cinematic Universe bis haut weider: Mat all Film gëtt e gréissere Plot, deen an engem Avengers-Film gipfelt, opgebaut a weider geféiert.

Wee gehéiert dozou?

Niewent de vu Marvel Studios selwer produzéierte Filmer wäert och deen nächsten Spider-Man-Film, Homecoming, zum Cinematic Universe gehéieren. De Spidey hat schonn en Optrëtt a Captain America: Civil War.