Sichen

Dir kéint och nach folgende gefalen

Wladiwostok: De Sommet vun den Aussesäiter
Fail Meenung

Wladiwostok: De Sommet vun den Aussesäiter

Si ass de Russen hir wichtegst Hafestad um Pazifik an

Weess du wéi een dës Lëtzebuergesch Wierder schreift?
Fail Meenung

Weess du wéi een dës Lëtzebuergesch Wierder schreift?

Scho fir di véierte Kéier presentéiere mer eisen Lëtzebuergesch Quiz!

Groussbritannien: D‘Theresa May gëtt sech eng nei Regierung
Fail Meenung

Groussbritannien: D‘Theresa May gëtt sech eng nei Regierung

Déi britesch Premierministesch huet um Méindeg konsequent Verännerunge vun hirer

dislike

Editorial: Facebook ass net däi Stammdësch

Editorial: Facebook ass net däi Stammdësch

D’sozial Medien hunn sech längst etabléiert. Laut TNS Ilres benotzen zu Lëtzebuerg 79% vun der Persounen eleng Facebook. Dat sinn enorm vill Leit. An do treffen déi ënnerschiddlechst Perspektiven a Meenungen openeen.

Villäicht am beschte kann een dat bei de Kommentaren op de Facebook Säite vun de verschiddene Medienhaiser gesinn. A laang genuch goufen des Kommentarberäicher wéi e rechtsfräie Raum behandelt.

Bei eisen däitschen Nopere gouf elo e Gesetz gestëmmt, wat et méi einfach maache soll, Haasskommentaren ze läschen. Et hëlt dobäi d’Plattformbedreiwere méi an d’Verantwortung. Kritiker fäerten, datt dëst zu enger Beschneidung vun der Meenungsfräiheet féiert. Schliisslech wieren dann d’Plattformbedreiwere wesentlech méi virsiichteg, wann et dorëm geet, wat se op hire Netzwierker zouloossen, a wat net. Well et si jo och si, déi d’Strofe fäerte mussen.

Keng nei Fro, sécherlech. Säit den Internet existéiert gëtt iwwerluecht, wéi e reguléiert kann a soll ginn. Wann et net grad eng Fro vun der Technik war, war et eng vum Gewëssen. Ass et wierklech ze vertrieden, Hasskommentaren einfach esou do stoen ze loossen? Am Numm vun der Meenungsfräiheet?

Mir kënnt do ëmmer d’Fro vum produktiven Notzen. Facebook huet nach viru Joren dorobber higewisen, einfach op „Counterspeech“ ze setzen. Dobäi wieren d’Notzer quasi an der Flicht, duerch d’Géigekommentéieren d’Hasskommentaren ze neutraliséieren. Datt dat net besonnesch gutt fonctionnéiert, ergëtt sech deels duerch déi virulent Natur vun Haasskommentaren.

Et kennt dann och dobäi, datt vill Säite grad vun dëse Kommentare liewen. Fake News Plattforme wësse ganz genau, wéi se hir Geschichten dréie mussen, vir eng méiglechst aggressiv Reaktioun vun hirem Publikum ze kréien. Deen léisst sech liicht a schnell oppeitschen, an da komme vill Reaktiounen a Kommentaren. Wouropper den Algorithmus vu Facebook reagéiert, an dee Post da méi wäit stréie wäert.

En hausgemaachte Problem also? Elo musse Mënschen selwer erugoen, an den Algorithmus entgéint wierken. Facebook huet méi Leit agestallt, fir alleguerten d’Reklammatiounen duerch ze kucken. Well d’Benotzer si jo selwer ugehalen, schlecht Inhalter ze mellen. An där Perspektiv sinn och Aktioune wéi déi vu Memes bis zum Weltraumkommunismus ze gesinn, déi tatsächlech Erfolleg haten, an eng berüchtegt rietsextrem Fake News Säit geläscht krut huet. No enger laanger, a koordinéiert Aktioun, versteet sech.

Esou Aktioune sinn d’Ausnam. An jo, et sollt dem Plattformbedreiwer seng Flicht sinn, aktiv géint esou Kommentare virzegoen. Well ënnert dem Stréch muss een einfach drun erënneren, datt des Haasskommentare keng Meenungen duerstellen. Et si verbal Attacke géint Persounen, Bevölkerungsgruppen, Reliounen an dergläichen. Dat kann een net einfach esou do stoe loossen.

Facebook ass ebe kee Stammdësch, mee éischter eng ëffentlech Plaz. Eng, wou jiddereen liese kann, wat deen anere schreift.

Ähnlech Sujeten Facebook, Haasskommentaren
Nächsten Artikel Virrechten Artikel