Sichen

Dir kéint och nach folgende gefalen

Anger Fest 3.0 – Headbange fir de gudden Zweck!
International Kultur Neiegkeeten Stories

Anger Fest 3.0 – Headbange fir de gudden Zweck!

Et war schonn déi drëtt Editioun vum Metal Festival an

Déi Demokratesch Partei am Wahlkampfmodus
International Kultur Neiegkeeten Stories

Déi Demokratesch Partei am Wahlkampfmodus

Et gëtt vill flott Säll am Land, wou een als

Stock-Car: Sonn a Reen hunn d‘Piloten erausgefuerdert
International Kultur Neiegkeeten Stories

Stock-Car: Sonn a Reen hunn d‘Piloten erausgefuerdert

Um Sonndeg huet zu Helleng déi zweet Manche vun der

What the Fakt – Internationalen Dag vun der Frankophonie!

What the Fakt – Internationalen Dag vun der Frankophonie!

Scho säit 1995 feiert Frankräich seng Sprooch mam internationalen Dag vun der Frankophonie. Dobäi soll déi kulturell Diversitéit vun der franséischer Sprooch ervirgehuewe ginn, déi weltwäit gekuckt vu méi wéi 274 Millioune Mënschen an iwwer 70 Länner geschwat gëtt.

De Saz „En français s’il vous plaît“ héiert een zu Lëtzebuerg net ze mann, an esou géif ee sech iwwert méi Initiativ fir déi national Mammesprooch freeën. Trotzdeem ass genau dës Formel de Motto vum dësjäregen Aktiounsdag, bei der Franséisch als modern Sprooch gewierdegt gëtt a sech un all jonk Persoune wennt. Mam Slogan wëll d’Generalsekretärin vun der Frankophonie, d’Louise Mushikiwabo, matdeelen, datt een senger Kreativitéit an Imaginatioun mat dëser moderner Sprooch fräie Laf soll loossen.

An dësem Joer ass d’Roukiata Ouédraogo, Komödiantin an Humoristin, d’Patin vum internationalen Aktiounsdag. Déi engagéiert Fra huet vir, am Kader vun der Frankophonie d’Bevëlkerung ze sensibiliséiert an op d’Aflëss vun de Wierder, dem Klang an d’Diversitéit vun der franséischer Sprooch opmierksam maachen. Nieft ville verschiddenen Evenementer ass et um Roukiata, fir dat frankophoont Diktat virzeliesen, woubäi nees zuelräich Leit deelhuele wäerten.

D’Géigegewiicht zur englescher Sprooch

Déi sougenannt Organisation Internationale de la Francophonie, der mëttlerweil méi wéi 50 Staaten ugehéieren, ass d’Interessevertriedung vun alle franséischsproochege Länner, woubäi et ëm méi wéi just den Austausch an den Dialog oder kulturpolitesch Moossname geet.

Divers Secteuren, wéi beispillsweis d’Energiepolitik, den Handel oder Entwécklungshëllefen, schaffen hei zesummen, fir esou an de verschiddene Länner d’Zougehéieregkeetsgefill an d’Solidaritéit ze stäerken, Konflikter ze vermeiden, sou wéi Rechtsstaatlechkeet an de wirtschaftlechen Opschwong ze fërderen. Donieft soll awer och ee Géigegewiicht zur englescher Sprooch an der Welt opgebaut ginn.

Hin zur Weltsprooch

Déi franséisch Sprooch gehéiert de romanesche Sproochen un. Am Laf vun der Zäit sinn hei Ausdréck aus der laténgescher Héichsprooch an dem Schrëftlatäin, sou wéi dem Kelteschen opgeholl ginn. Am Joer 1539 ass Franséisch schliisslech an der Ordennance de Villers-Cotterêts als offiziell Landessprooch festgesat ginn.

Duerch d’Académie Française ass am 16. a 17. Joerhonnert och d’Grammatik geännert an eenheetlech festgesat ginn, wouduerch verschidde Reegelen entstane sinn, déi dës Sprooch méi reng an androcksvoll wierke loosse sollen. Duerch d’Zäitalter vun der Opklärung ass Franséisch schliisslech vu Vertrieder wéi dem Montesquieu oder dem Voltaire och iwwert d’Grenzen eraus bekannt ginn.

Spéitstens wou déi frankophon Sprooch zur Sprooch vum Haff beim europäeschen Adel ginn ass a sech Frankräich zu enger vun den aflossräichste Kolonialmuechte vun der Welt erhuewen huet, ass dës Sprooch an diverse Länner etabléiert ginn a gëtt och bis haut nach geschwat. Dobäi kann een e puer erstaunlech Fakte vum Joer 2018 erauspicken:

  • 44% vun de franséisch-schwätzende Leit wunnen an Europa, 46,3% an Afrika, 7,6% an Amerika, 1,8% an Asien an 0,3% an Ozeanien.
  • Franséisch ass déi zweetwichtegst Sprooch vun den internationale Medien.
  • Och bei multilaterale Bezéiungen (UNO; OECD, WTO,…) ass déi frankophon Sprooch ee wichtegt Mëttel op internationalem Niveau.
  • Nieft Chinesesch, Englesch, Hindi, Spuenesch an Arabesch ass Franséisch déi wichtegst Sprooch weltwäit. Knapp hannendru kënnt Portugisesch.
  • Et gëtt geschat, datt bis 2050 ronn 770 Millioune Leit dës Sprooch schwätze wäerte, wat soumat ee grousst Wirtschaftspotential duerstellt.

De Premierminister Bettel zum Dag vun der Frankophonie

Och eise Premierminister Xavier Bettel ërennert an dësem Kader un d’Geschicht vu Lëtzebuerg, ee Land, wat schonn ëmmer déi franséisch Sprooch begënschtegt huet.Am Joer 1967 hat déi haitegt Assemblée Parlementaire de la Francophonie dësen Aktiounsdag virgesinn. Schonn 3 Joer méi spéit huet Lëtzebuerg zu den 21 Grënnungsmembere vun der internationaler Organisatioun vun der Frankophonie gehéiert.

Als eng vun den dräi offizielle Sproochen hei am Land bleift Franséisch weiderhin ee wichtegt Kommunikatiounsmëttel. De Minister Bettel hieft dobäi ervir, datt de Grand-Duché als plurilingualt Land bekannt ass, an een dorop immens houfreg ka sinn. Domat ëffnet sech eis Natioun der Welt, akzeptéiert d’Diversitéit a verbreet d’Toleranz.

Am Juli 2017 konnt déi parlamentaresch Versammlung vun der Frankophonie säi 50-järege Jubiläum zu Lëtzebuerg feieren. Dobäi ass dës Sprooch net nëmmen ee Verständegungsmëttel, mee virun allem vu groussem Wäert fir d’Demokratie an d’Mënscherechter.

Bei der Staatsvisitt a Frankräich war nieft dem Premierminister och de Grand-Duc an d’Grand-Duchesse vertrueden an huet bei der Ried vum franséische President Macron an der Académie Française gespaant nogelauschtert. Dobäi huet de President eng Rei Moossnamen opgezielt, déi hëllefe sollen, d’Roll vun der franséischer Sprooch ze stäerken an de Plurilinguismus an der Welt ze verbreeden, andeems virun allem d’Educatioun an Afrika verbessert gëtt. Generell ass d’Verbesserung vun der Aschoulung eng Prioritéit a Kooperatioun mat Lëtzebuerg. D’Partnerschaft soll virun allem fir de Senegal, den Niger, Mali an de Burkina Faso agéieren.

Am Joer 2020 ass zu Tunis, Haaptstad vun Tunesien, ee weidere Sommet virgesinn. Dëst Evenement wäert de 50. Gebuertsdag vun der Organisatioun markéieren.

Ähnlech Sujeten Afrika, Emmanuel Macron, Frankräisch, Franséisch, franséisch Kolonie, Grand-Duc Henri, Grand-Duchesse, Internationalen Dag vun der Frankophonie, Paräis, Sprooch, What the Fakt, Xavier Bettel
Nächsten Artikel Virrechten Artikel