D’Gripp zu Lëtzebuerg ukomm: Op wat een elo oppasse sollt

An dëser Woch konnten déi éischt Grippefäll zu Lëtzebuerg festgestallt ginn. D’Direktioun vun der Santé schätzt, datt den Héichpunkt vun der Grippesaison bei eis wuel an der éischter Halschent vum Januar erreecht gëtt. Aus dësem Grond wäerte wuel an der zweeter Halschent vum Januar 2020 an Ufank Februar méi Krankeschäiner geschriwwe musse ginn.

Déi 6 Fäll sinn 2 Mol duerch de Virus AH1, 2 Mol duerch de Virus AH3 an 2 Mol duerch de Virus B ervir geruff ginn. De Grippevirus verbreet sech einfach vun enger Persoun zur Nächster duerch Tröpfchen, virun allem beim Houschten oder Néitsen. Dobäi kann d’Krankheet sech schnell wärend enger Saison ausbreeden.

D’Reegele vun der Hygiène respektéieren!

Déi klassesch Reegele vun der Hygiène sollte grad zur Grippezäit ëmgesat ginn, esou datt déi schnell Verbreedung vun der Epidemie esou wäit wéi méiglech agedämmt gëtt. Dofir gëllt

• Sech reegelméisseg d’Hänn mat Seef ze wäschen
• An een Nuesschnappech oder an d’Armbeug ze houschten/ze néitsen
• Säi Pabeiernuesschnappech nom Benotzen ewech ze geheien
• De Kontakt zu kranke Persounen ze vermeiden

D’Gripp äussert sech dobäi duerch folgend Symptomer:

• Féiwer (ëm 39 °C)
• Schlëmm Middegkeet (Asthenie)
• Kappwéi (Cephalgie)
• Muskelkater (Muskel- an/oder Gelenkwéi)
• Schüttelfrost
• Heiansdo och Houscht an Schnapp

Eng Impfung géint d’Gripp?

Fir d’Ausbreedung vun der Gripp ze limitéiere réit de Gesondheetsministère der Ëffentlechkeet sech virum Ufank vun der Saison impfen ze loossen. Heibäi riicht ee sech virun allem un eeler Persounen (iwwer 65 Joer), schwanger Fraen, Risikopersounen a Leit aus dem Gesondheetsberäich.

Bei dëser Risikogrupp iwwerhëlt d’Krankekeess (CNS) d’Käschte vun der Grippeimpfung. Si stellt nach ëmmer de beschte Schutz duer, fir weider Komplikatiounen ze verhënneren. Scho 15 Deeg no der Piqûre ass d’Immunsystem prett, fir sech géint de Virus ze schützen. D’Wierkung hält 6 Méint un.

Fir weider Informatioune kann een beispillsweis www.sante.lu oder www.grippe.lu besichen.