Harespelen: Schlechte Ruff, nëtzlech Insekten

vun Shari Pleimelding den 16/04/2020

Harespelen: Schlechte Ruff, nëtzlech Insekten

Duerch déi besonnesch Ëmstänn an d’Ausgangsbeschränkungen, wéi och déi elo scho fréisummerlesch Temperaturen am Abrëll 2020, wäerte vill Harespelen sech an dësem Joer méi fréi bemierkbar maachen. Jo, et kënnt zu onnéidegen Onrouen an awer ass et grad elo méiglech, einfach an douce anzegräifen, ouni datt een zu Schued kënnt.

Meeschtens stéieren d’Harespelen eréischt am Héichsummer, wa mir gemitterlech mat engem Stéck Taart oder enger Glace dobausse sëtzen. Ma, an dësem Joer ass dat anescht. Aktuell sinn déi meescht Observatioune vun Harespelen op Feldharespelen oder déi zuelräich solitär Harespelen a Beien zeréckzeféieren.

Feldharespelen bilde just kleng Näschter ouni Schiel, a mat de wéinegen Individuen sinn si allgemeng kaum aggressiv. Dës Aarte kommen och spéider net méi un eis Liewensmëttel frupsen. Solitär Beien an Harespelen bilde keng sozial Staaten a weisen dofir iwwerhaapt kee Verdeedegungsverhalen op. Hire Stachel ass zudeem schwaach bis guer net ausgebilt, sou datt si net express picke géifen.

Effektiv wäerten awer an den nächste Wochen ëmmer méi Kinniginnen vu sozialen Aarte versichen hir Näschter ze bauen an ee Vollek ze grënnen. An dësem Zesummenhang gëtt et interessant ze wëssen, datt just 1 vun 10 Individuen dobäi Erfolleg wäert hunn.

Dës weideren stellen eigentlech just 2 vun de 15 zu Lëtzebuerg unzetreffende sozialen Harespelaarten, déi Staate bilden an zesummen an Näschter liewen, ee Konfliktpotential fir de Mënsch duer. Allgemeng sinn si nëtzlech Déieren, déi eng wichteg Roll am Naturhaushalt spillen: Net nëmme bestëbse si Bléien, mee agéieren och als „Gesondheetspolice“.

Donieft joe si Insekten, wat si zu natierleche Schiedlengsbekämpfer mécht. Esou deet een der Natur ee grousse Gefalen, wann een hir Näschter op onproblematesche Plazen toleréiert.

Si brauche Gewunnechten

Harespelen benéidegen eng gewëss Routine. Kënne si bestëmmt Mënschen, hir Stëmmen a Gewunnechten, esou musse si net méi esou beonrouegt reagéieren. Sollt sech also net grad een Allergiker am Haus befannen, esou kann een d’Nascht dulden. Doriwwer hinaus ass d’Zerstéieren vun hiren Näschter, vun deene keng direkt Gefor ausgeet, laut Naturschutzgesetz verbueden.

Wëll ee potentielle Problemer aus dem Wee goen, esou sollt ee vun Ufank un d’Usiidlung un ongënschtege Plaze vermeiden. Am Abrëll a Mee, bis Ufank Juni sinn déi meescht Näschter nach am Ufanksstadium. An dëser Phas loosse sech d’Déiercher nach liicht verdreiwen. Et gëtt geroden:

Donkel Schappen, Abrisen a Spillhaiser solle reegelméisseg kontrolléiert an d’Kinnigin fréizäiteg beim Bau gestéiert ginn. Och al Mauslächer sollt een am A behalen.
Rolllueden, besonnesch vun der Terrass, dem Balcon an der Schlofkummer sollen all Dag beweegt ginn.
Op besonnesch schwéiere Plazen kënnen ätheresch Ueleger (z.B. Eukalyptus, Zitroun, Téibam, Zeder oder eng Mëschung op ee Stéck Watt drëpsen, respektiv sech asprayen – 1 Deel Ueleg op 10 Deeler Alkohol) preventiv hëllefen.

Dir braucht ee Rot?

Sollt Dir Iech onsécher sinn, Dir Froen hutt oder Hëllef braucht, da stinn déi fräiwëlleg Harespelberoder Iech per Telefon zur Verfügung. Erreeche kënnt Dir si iwwert d’Hotline ënnert der Nummer 621 969 444. Dobäi gitt Dir gebieden ee Message ze hannerloossen, uschléissend kontaktéiert Iech de passende Beroder.

Kontakter vu lokale Beroder kritt Dir zudeem bei Ärer Gemeng, den Naturschutzzentren, an Naturparken oder Biologesche Statiounen.

Donieft huet natur&ëmwelt een Informatiounsflyer zu de verschiddenen Harespelen an dem Verhalen bei Begéinungen erstallt. Dës Broschür fannt Dir online op www.naturemwelt.lu oder zum direkten Download HEI. Wëllt Dir ee physescht Exemplaire, esou kënnt Dir eng Bestellung opginn iwwert d’Telefonsnummer 29 04 04 1 oder per Email ënnert secretariat@naturemwelt.lu.