Fir de Klimaschutz: D’Lycéesschüler kréien d’Wuert!

No der Manifestatioun um 15. Mäerz 2019, bei der dausende Schüler an der Stad géint de Klimawandel protestéiert hunn, gëtt d’Regierung elo der Jugend d’Wuert. Als Äntwert op hir grouss Mobiliséierung solle jonk Leit aktiv an der Sich an der Entwécklung vu Léisungen zum Schutz vum Planéit mat abezu ginn.

De Premierminister Xavier Bettel hat kuerz nom Protest d’Delegatioun vu Youth for Climate Luxembourg getraff, fir esou den Dialog mat de Jonke ronderëm de Klimawandel ze verdéiwen. Fir den Erwaardungen an de Propositioune vun de Schüler aus dem Lycée nozegoen, huet den Educatiounsministère, den Ëmweltministère an de Landwirtschaftsministère a Kooperatioun mat der Conférence Nationale des Élèves du Luxembourg (CNEL) entscheet, 5 regional Echangen ze organiséieren.

Op der Plaz wäerten d’Ministere Claude Meisch, Carole Dieschbourg a Romain Schneider sinn. Atelieren zu folgenden Theme wäerte geleet ginn:

• Nohalteg Schoulen
• Klimaschutz am Beräich Bauen, Mobilitéit, Energie an Offall
• Nohalteg Produktioun a Consommatioun

D’Resultater vum Echange sollen dozou bäidroen den nationalen Energie- a Klimaplang vun der Regierung weider ze dreiwen. Ufanks 2019 hu si nämlech een éiergäizege Plang opgestallt mat nationalen Ziler a Saache Reduktioun vum Zäregas, erneierbar Energien an energetesch Effikassitéit. Déi aktuell Echangë mat den Acteuren aus der Gesellschaft – dozou gehéieren och d’Schüler – erméiglechen et, dës Ziler konkret ëmzesetzen.

Folgend thematesch Echangë gi mat de Schüler organiséiert:

• Mëttwochs, den 8. Mee 2019 vu 14:00 bis 17:00 Auer am Forum Geesseknäppchen zu Lëtzebuerg
• Freides, den 10. Mee 2019 vu 14:00 bis 17:00 Auer an der Aler Seeërei zu Dikrech
• Méindes, den 13. Mee vu 14:00 bis 17:00 Auer am Forum Geesseknäppchen zu Lëtzebuerg (Fir d’Schüler aus dem europäeschen an internationalen Enseignement; de Minister Claude Turmes ersetzt hei d’Ministesch Dieschbourg)
• Mëttwochs, de 15. Mee 2019 vu 14:00 bis 17:00 Auer am Maacher Lycée zu Gréiwemaacher
• Freides, de 17. Mee vu 14:00 bis 17:00 Auer am Lycée Nic-Biever zu Diddeleng

D’Schüler, déi heirun deelhuele wëllen, hu sech am viraus missen umellen, fir am Cours entschëllegt ze ginn.

Opmaacherbild: © Elsa Palito / Greenpeace