Nationaalt Verkafsverbuet vu Glyphosat ab dem 1. Juli

Ab dem haitege Mëttwoch gëllt en nationaalt Verbuet fir de Verkaf vu glyphosathaltege Mëttel, souwuel fir privat, wéi och fir professionell Zwecker. Domat ass Lëtzebuerg dat éischt Land an der Europäescher Unioun, dat der Fuerderung vu Millioune Biergerinnen a Bierger an Europa no engem Verbuet vu Pestiziden nokënnt, egal wéi eng Zouloossung et um europäeschen Niveau bis zum 15. Dezember 2022 huet.

Glyphosat ass de weltwäit am meeschte verwennte Pestizid. D’Weltgesondheetsorganisatioun stuuft d’Chemikalie als „wahrscheinlech kriibserreegend“ an. De François Benoy, Deputéierten, President vum Ëmweltausschoss a Vize-President vum Agrarausschoss freet sech iwwert dëse wichtege Schrëtt:

„Haut ass e gudden Dag fir d’Natur an d’Gesondheet vun de Mënschen! Mat dem haut a Kraaft triedende Verkafsverbuet fir glyphosathalteg Pestiziden, hëllt Lëtzebuerg eng Virreiderroll an um Wee zu enger méi nohalteger Bewirtschaftung vu Felder a Gäert. Aner Memberstaaten, wéi beispillsweis Éisträich, hu schonn ugekënnegt, dem Beispill vu Lëtzebuerg nozegoen an een ähnlecht Verbuet duerchzesetzen.

Ech well der Zivilgesellschaft, de Millioune Biergerinnen a Bierger zu Lëtzebuerg an a ganz Europa Merci soen, déi sech an de leschte Joren mat vill Engagement fir ee Glyphosatverbuet agesat hunn.“

Matgedeelt vun déi gréng

Opmaacherbild: © Scott Goodwill / Unsplash