En oppene Bréif un de Minister Meisch

Mat engem oppene Bréif riicht sech de Grupp „Covid in Schools – Luxembourg“ un den Educatiounsminister Claude Meisch.

Här Meisch,

Mir sinn e Grupp u Persoune vum Facebook-Grupp „Covid in Schools – Luxembourg“, dee scho méi wéi 1.000 Memberen an enger Woch gewanne konnt.

Mir adresséieren eis un Iech an der Hoffnung, datt Dir ob eist Uleies an eis Suergen zur aktueller Evolutioun vum Covid-19 an de Schoulen äntwere kënnt.

Bis haut sinn d’Elteren immens besuergt: D’Realitéit schéngt eis anescht, wéi et an de leschten verëffentlechte Rapport gewise gëtt.

Et gëtt Zäit méi Transparenz ze weisen: D’Zuel an d’Plazen u positive Covid-Fäll mussen schnellstméiglech matgedeelt ginn, net iwwert Rumeuren an net iwwert Informatioune vu privaten alternative Kanäl. D’Elteren mussen Decisiounen treffe kënnen, déi op de realen Informatioune baséieren, déi vun enger vertrauenswierdeger Quell verëffentlecht ginn. Soss verbreede sech Panik an Angscht. Mir hunn zu Lëtzebuerg déi eemoleg Geleeënheet e Beispill fir déi aner europäesch Länner ze sinn.

Mir invitéieren Iech héiflech d’Statistiken zu de Schoulen ze verëffentlechen, sou wéi et och d’Europaschoul mécht – an dat iwwert d’Internetsäit, Facebook oder E-Mail.

D’Situatioun a real Informatiounen ze verstoppen léisst näischt anescht wéi Mësstrauen bei der Bevëlkerung, déi schonn ëmmer manner Vertrauen an Är Institutioun huet, entstoen.

D’Aktualiséiere vun der Situatioun an de Schoule kënnt oft ze spéit fir d’Elteren, wann et e Covid-19-Fall an der Klass gëtt. Speziell fir Eltere vu vulnerabele Kanner, oder wann Elteren selwer vulnerabel sinn, erweist sech d’Situatioun net berouegend.

Mir bieden Iech also frëndlech verschidde Moossnamen direkt anzeféieren, sou wéi beispillsweis:

• Botzpersonal anzestellen, déi sech ëm d’Hygiène an de Klassen, de Schoulen an an de Maison Relaisen këmmeren, sou wéi et beispillweis an der Europaschoul de Fall ass, wou reegelméisseg gebotzt an desinfizéiert gëtt, ouni datt dat zu de Responsabilitéite vun den Enseignanten gehéiert, déi sech ob hir Aarbecht konzentréiere sollten an net ob d’Botzen an d’Desinfektioun;
• Méi oft a reegelméisseg an de Maison Relaisen/Dagesfoyeren a Schoulen testen a Kontrollen bei privaten Organisatiounen duerchzeféieren. Et muss eppes gemaach ginn, fir datt séchergestallt gëtt, datt d’Personal reegelméisseg getest gëtt, well si deel vun der Infektiounskette sinn. D’Bréiwer a Quarantaine, sou wéi an den Test mussen ze goen kënnt bei de Schüler oft mat e puer Deeg Verspéidung un. Vum Aspekt Sécherheet an de Schoulen hir ass dat net ze akzeptéieren;
• Eng grouss Angscht kënnt säitens de vulnerabele Kanner oder de Schüler mat vulnerabele Familljemember. Si schénge säit dem September vergiess ze ginn. Och wann Schoul Doheem a verschidden Etablissementer ganz gutt fonctionnéiert, klappt et net esou wéi et sollt an d’Kanner gi vernoléissegt. Bildung ass e Recht fir jiddwereen. Verséchert also wann ech gelift, datt d’Schoul op Distanz uniform organiséiert gëtt.
• Mir wëllen och ob d’Situatioun agoen, wou Kanner mat engem oder méi vulnerabele Memberen an hirer Famill zesumme wunnen. De Premierminister huet d’Wichtegkeet vum Schutz vu vulnerabele Persounen ervirgehuewen, an dat ka just realiséiert ginn, wann d’Famillen och d’Méiglechkeet kréien d’Schoul ob Distanz ze maachen. Besteet dës Optioun emol, muss och séchergestallt ginn, datt jiddwereen de selwechte Bildungsniveau kritt, ouni datt d’Situatioun tëscht den Etablissementer, Enseignanten, Professeren a Schoulen variéiert.
• Dës weideren muss eng Léisung fir déi iwwerfëllt Busser fonnt ginn. D’Busser sinn iwwerlaascht, d’Fenstren zou, ee Kand sëtzt direkt nieft dem aneren, an dat deelweis och ouni Mask oder d’Mask sëtzt net korrekt. Dës Situatioun erweist sech als méi geféierlech, wéi d’Zäit an de Klassen;
• Kommt wann ech gelift ob d’Wichtegkeet vum Droe vun enger Mask an de Schoulen zeréck. Dat ass nämlech immens effikass;
• Maacht och wann ech gelift d’Lëften vun de Klassesäll obligatoresch an investéiert an zousätzlech Belëftungsméiglechkeeten. Och dat huet sech als effikass erwise, fir d’Ausbreedung vum Virus ze bekämpfen.

Zum Schluss wéilte mir Iech och bieden d’Resultater vun engem eréischt kierzlech verëffentlechte Sondage (virun 3 Deeg publizéiert) zur Kenntnis ze huelen, deen iwwert d’Moossnamen handelt, déi an der Schoul ergraff musse ginn, fir dës als „esou sécher wéi méiglech“ betruechten ze kënnen. D’Membere vum Grupp hu folgend Moossnamen proposéiert:

• Zeréck bei d’A/B-Gruppen mat Live-Streaming, respektiv Iwwerdroung via Teams vun de Gruppen Doheem;
• D’Schléissung vun de Lycéeën um 13:00 Auer, fir esou d’Mëttegpausen an den Etablissementer, déi um 14:00 Auer Schluss hunn, ze vermeiden (ouni datt d’Stonne vum Cours verluer ginn);
• Obligatorescht Droe vun der Mask an de Lycéeën (ouni datt d’Direkteren e Choix kréien);
• Maximal Distanz tëscht de Bänken;
• Keng Rotatioun vun de Klassen oder Desinfektioun vun alle Bänken an dem genotzte Material an de Klassen, sou wéi keng gemëschte Klasse fir déi zweet oder drëtt Sprooch oder aneren Optiounscours;
• Verlängerung vun der Allerhellgevakanz em eng Woch, fir déi aktuell Infektiounsketten ze briechen;
• Méiglechkeet vu Schoul ob Distanz fir Schüler/Familljen, déi dat wëllen (als Optioun). Dat reduzéiert d’Zuel vu Schüler an der Klass;
• Cours an Evaluatioun ob Distanz fir vulnerabel Schüler, sou wéi fir Schüler mat engem vulnerabele Familljemember;
• D’Aféiere vun Apparater, déi d’Loft propper maachen;
• Isolatioun vun der Klass ab dem éischten Dag, wou e positive Fall bekannt ass. An dat mat Streaming vun de Coursen, fir esou d’Ausbreedung vum Virus ze vermeiden. Dës weideren proposéiere mir d’Isolatioun vun der Klass am Fall wou e Professer positiv getest ginn ass an hien an de 7 leschten Deeg Kontakt mat der Klass hat (amplaz vun den 2 bis 3 Deeg);
• Den aktuelle System bäibehalen;
• Uschléissend Enseignement op Distanz;
• D’Aféiere vun de Reegelen aus dem Horesca-Secteur an de Kantinnen a Maison Relaisen;
• Kee Sport dobannen;
• Sport mat de selwechte Reegelen, wéi fir d’Ëffentlechkeet.

Mir hoffen, datt eist Uleies gehéiert gëtt an datt Léisunge fonnt ginn. Mir erwaarde mat Ongedolg eng Äntwert vun Ärer Säit.

Mat frëndleche Gréiss,

Grupp „Covid in Schools – Luxembourg“