Sichen

Dir kéint och nach folgende gefalen

money
NAFTA: Ginn sech d‘Kanadier mat den Amerikaner eens?
Meenung Neiegkeeten

NAFTA: Ginn sech d‘Kanadier mat den Amerikaner eens?

Bei der „Reform“ vum Fräihandelsofkommes NAFTA, dee säit 1994 déi

geek
Better Call Saul weist, datt e Prequel muss duerchootme kënnen
Meenung Neiegkeeten

Better Call Saul weist, datt e Prequel muss duerchootme kënnen

Wéi Breaking Bad ugelaf war, war dat de Start fir

Gebuertsdag emol anescht: „Mir dierfen net bei dech kommen, denken awer un dech!“
Meenung Neiegkeeten

Gebuertsdag emol anescht: „Mir dierfen net bei dech kommen, denken awer un dech!“

Wann eppes gezwongenermoossen ausfält, muss ee sech eng Nei afale

Oppene Bréif: Sue maachen d’Léit an de Planéit net gesond!

Oppene Bréif: Sue maachen d’Léit an de Planéit net gesond!

Um 22. Juli huet sech d’Nathalie Meier-Hottua vu [R]Evolution mat engem Bréif un d’Gesondheetsministesch Paulette Lenert geriicht. Mat hirem Message thematiséiert d’Ekonomistin a Primal Health Coach d’Nodeeler vum lukrative Gesondheetssystem an zielt Moossnamen op, wéi een d’Wuelergoe an d’Gesondheet vun der Bevëlkerung nohalteg verbessere kann.

D’Erklärung kënnt Dir Iech souwuel als Video ukucken, wéi och a schrëftlecher Form liesen (ënnert dem Video).

Léif Madamm Lenert,

ech wéilt am Moment net onbedéngt an Äre Schong stiechen; d‘Situatioun an déi Dir era katapultéiert gouft, ass méi wéi ondankbar an ech ka mir virstellen, wat dat fir e Stress fir Iech ass.

En plus sidd Dir als Juristin, fir a Saache Santé kënnen ze decidéieren, op de Rotschlo vu baussen ugewisen, an der Hoffnung, dass d‘Meenung vun Ären Experte méi richteg ass wéi déi vun deenen déi et anescht gesinn.

Zu dem Drock deen Dir souwisou schonn hutt, kënnt zousätzlechen Drock aus enger ëmmer méi onzefriddener Populatioun. D‘Vertrauen an d‘Politik an d’Medien geet dramatesch erof an d‘Unzuel vun de Suiciden dramatesch erop. Dir sidd am Moment laut aktuellen Ëmfroen dee leschte verbleiwende Sympathieträger – och fir mech – an dofir schreiwen ech Iech elo och un.

Dir hutt et net einfach an de But vun dësem Bréif ass et net, fir Iech et nach méi schwéier ze maachen. Bien au contraire!

Mäi Wonsch wier et, dass de ganze System endlech géing ufänken d’Problemer un der Wuerzel unzepaken a sech net exklusiv op d’Symptombekämpfung géing limitéieren. Dat passéiert nämlech permanent, zanter e puer honnert Joer an dës Tendenz verstäerkt sech praktesch exponentiell an zwar an alle Beräicher: fir d’éischt schafe mir e Problem an da siche mir no Léisunge fir d’Konsequenze vum Problem ze behiewen, woubäi d’Niewewierkungen vum Problem an déi vun der Léisung sech à long terme addéieren. Dat ass zwar finanziell interessant, awer Sue maachen d’Leit an de Planéit net gesond. Et gëtt och keen Ënnerscheed tëschent Ëmwelt a Gesondheet, déi 2 si strictement inséparabel.

Wier et net vill méi einfach a natierlech, wa mir einfach géingen ophalen, Problemer ze schafen?

Genau! Mir hunn deemno 2 Problemer: mir hu vill ze vill Leit deenen hiren Immunsystem defekt ass an onse Gesondheetssystem ass scho méi wéi saturéiert domadder, deene Leit déi net gutt mat hirer Gesondheet ëmginn, mat der (lukrativer) Symptombekämpfung ënnert d‘Äerm ze gräifen.

D‘Bild vun de Leit, déi stonnelaang am Auto (!!!) mat Masken (!!!) an der Waardeschlaang vum McDonalds (!!!) gewaart hunn, esou dass d‘Police huet missen intervenéieren, ass déi perfekt Karikatur fir onse System.

Eng Santé, déi éierlech un der Gesondheet vun de Leit interesséiert ass, mécht a mengen Ae Folgendes:

  1. Si verdeelt zwar Masken, fir de kuerzfristege Problem ze geréieren, erkläert awer gläichzäiteg dass et mëttel a laangfristeg wesentlech méi wichteg ass, säin Immunsystem ze fleegen fir dass en och géint dës Menace eng Protektioun kann entwéckelen, eppes wat schonn zanter e puer Millioune Joer funktionéiert. Wat mir méi staark sinn, wat besser! Wat mir ons méi schounen, wat mir ons méi schwächen.
  2. An deem Kontext verdeelt se gläichzäiteg Vitamin C, Vitamin D, Zink, Melatonin, Pro- a Prebiotika an erkläert, firwat grad dës Complementer am Moment wichteg sinn.
  3. Si alliéiert sech mam Sportsministère an organiséiert en dynamesche Marketing a Saache Beweegung, Spill, Spaass an Entspanung fir virun allem bei deene Jonken d‘Aggressiounspotential ze kanaliséieren. Ech kéint mir gutt virstellen, dass dëst gutt géing funktionéieren wann ee sech géing mat bekannte lokale Spëtzesportler (Krombach, Schleck, Müller, Bockel …) oder fräiwëllege Fitness-Clubs associéieren, mat hinnen Bootcamps, Randonnéeë… etc organiséieren, ewech vum Computer, dem Telefon, der Tëlee an dem Radio, wou vill ze vill negativ Noriichte lafen. Am Moment kritt een do just Negativitéit, Skandaler, Krisen a Perspektivlosegkeet gebueden: de Kollaps vun onsem Planéit: Fauna, Flora Klima; astronomesch Scholden; geopolitesch Problemer, keng Aussicht op eng Aarbecht a villes méi. Wéini hutt Dir fir d’lescht eppes Positives an de Medie gelies/héieren? Och ouni Pandemie. Et schéint mir eng ganz logesch Konsequenz ze sinn, dass d‘Leit de Verstand verléieren a sech op eng Aart a Weis defouléieren, déi weder konstruktiv nach korrekt ass. (Dräi Eechelen, Kinnekswiss…) Oder sech ëmbréngen. Jee no individuellem Gemitt …
  4. Si alliéiert sech mam Transportministère fir d‘Leit ewech ze kréie vum Auto, zréck zu der net-motoriséierter Fortbeweegung fir déi kuerz a mëttel Distanzen a promouvéiert konsequent de Vëlo als privilegiéierten Transportmëttel, dee bekanntlech bal iwwerall an de Butteker ausverkaaft ass. D‘Demande ass deemno do, mee d‘Infrastruktur stëmmt net!
  5. Si mécht aktive Marketing fir lokal, saisonal, frësch Liewensmëttelen aus nohalteger a biologescher Landwirtschaft, ewech vun industriellem Iessen, Massendéierenhaltung an onnéideger Importwuer. Si fërdert dës Aart vu Liewensmëttelversuergung, zentral an dezentral: versiggelt Surfacen (Beton, Steng …) oder englesch Wise ginn taxéiert, eng Blummewis fir Beien, e Bongert oder en eegene Geméisgaart gi gefërdert, e geplanzte Bam gefërdert, e gefällte Bam penaliséiert …
  6. Si hält op mat der Subventioun vun der industrieller Landwirtschaft, déi dozou gefouert huet, dass de Präis de Kaf vun engem Liewensmëttel bestëmmt a net d’Qualitéit. Gläichzäiteg gëtt just nach déi nohalteg a konsequent Bio-Landwirtschaft subventionéiert, wou de lokale BioProduit da fir de Verbraucher méi abordabel gëtt.
  7. Si erhéicht Taxen op „Fake- a Fast Food“, also Liewensmëttel ouni Nierstoffer, chemesch Additiven, Zocker a verbitt Massendéierenhaltung (déi et och am Grand-Duché gëtt!).
  8. Si stellt déi „aktuell“ Liewensmëttelpyramid a Fro déi ënner anerem op Lobbying aus de 50er a 60er Jore berout a sech nëmme ganz ganz lues un aktuell wëssenschaftlech Erkenntnisser upasst.
  9. A wou mir scho beim Lobbying sinn: de Pharmasecteur ass zu Lëtzebuerg de Spëtzereider, wat seet dat Iech? Ech géing de ganze Lobbying zum Wuel vu “menger” Populatioun op d’Kopp stellen.

Wann ech mech politesch géing opsetzen da wier dat en Deel vu mengem Walprogramm: Positivismus, Perspektiven a Gesondheet! Meng Lëscht ass nach vill méi laang, mee Dir hutt vill ze dinn, Madamm Lenert.

2 Bréiwer d‘lescht Joer, also laang virun der Pandemie, un Äre Virgänger an un onse Staatsminister goufe leider ganz lapidar traitéiert, mat Verweis op d‘Recommandatiounen vun der Santé … wou ech awer ganz vill „falsch“, vereelzten, respektiv vun Interesse gefierfte Recommandatioune gesinn.

Ech schreiwen Iech dëse Bréif als Primal Health Coach, eppes wat ech aus perséinleche Grënn niewelaanscht studéiert hunn, fir meng eege Gesondheet erëm hierzestellen, eppes wat onse System, esou wéi en opgebaut ass, net fäerdeg bruecht hat. Et geet ëm eng ganzheetlech, natierlech Approche am Aklang mat onser Genetik.

An deem Kontext stinn ech an enkem intellektuelle Kontakt mat Dokteren, déi d’Fachwëssen wat ech mir an de leschten 10 Joer ugëeegent hunn, confirméieren a mäi Buch aus vollem Häerz recommandéieren. Vun hinne kréien ech och ëmmer erëm gesot, dass ech mech mat der Santé soll zesummen ze dinn, fir meng ganzheetlech a natierlech Approche ënnert d‘Leit ze bréngen. Haaptberufflech sinn ech Ekonomist a mir deemno duerchaus bewosst iwwert déi finanziell Konsequenzen vun enger besserer Gesondheet vun der Populatioun. Mee do wou manner era kënnt, entfalen am Géigenzuch och vill Käschten, déi mat de „moderne“ Krankheeten ronderëm de metabolesche Syndrom, Kriibs, Autoimmunkrankheeten a vill méi Mësselen verbonne sinn. Dat ass, wéi Dir sécher wësst, eng astronomesch Zomm.

Villäicht sidd Dir jo méi interesséiert an open-minded wéi Äre Virgänger; ech géing mech iwwert e konstruktiivt, virun allem positiivt Gespréich mat Iech immens freeën a wënschen Iech weider vill Courage an der aktueller Situatioun.

Nathalie Meier-Hottua
www.revolution.lu

Opmaacherbild © Emma Simpson / Unsplash

Ähnlech Sujeten Fortbeweegung, Gesond, Gesondheet, Immunsystem, Kritik, Léisungen, Lokal a saisonal Produkter, Nathalie Meier-Hottua, Oppene Bréif, Paleo, Paulette Lenert, Pharmasecteur, Problem, Revolution, Sport, Vëlo
Nächsten Artikel Virrechten Artikel