PINEWAY Album-Release vu „Shift“ de 4. Abrëll 2020 am Rockhal Floor

Bréngt ee säin éischten Album eraus, da fält wuel all Museker ee Stee vum Häerzen, wärend ee gespaant op d’Reaktioune vun de Fans waart. Ma esou gesäit et elo och fir déi nei Lëtzebuerger Alternative-Rock-Band PINEWAY aus. Hiren Debut-Album Shift gëtt um 4. Abrëll 2020 am Rockhal Floor presentéiert.

Mat modern Synth-Sounds, melancholesche Pianomelodien, Grunge-Gittarriffs an engem onvergläichlech markante Bass huelen si de Publikum op eng spannend Rees vu banneschte Kämpf, eegener Reflektioun, an perséinlecher Evolutioun mat. Domat awer net genuch. Den Debut-Album Shift handelt vun der ambivalenter mënschlecher Natur. D’Liewe schreift seng eege Kapitelen, aus deenen ee léiert, sech weider entwéckelt a verännert.

Scho bei hiren Optrëtter uechtert d’Bars a Clubs vun der Groussregioun am Dezember 2016 konnten d’Museker vu PINEWAY d’Fans fir sech gewannen. Aktuell bléckt d’Band houfreg op hir Performance um MooFest vum 8. Februar 2020 an der Rockhal zeréck. Pineway besteet iwwregens aus dem Ramon (Gesang), dem Claudio (Gittar), dem Andy (Bass), dem Christian (Keyboard) an dem Chris (Battrie).

Wéi, wat a wou?

D’Release-Party vu PINEWAY fënnt, zesumme mat der däitscher Hard-Rock-Band Red Light District an der alternativer Rockband Fallen Lies, um 4. Abrëll 2020 am Rockhal Floor statt. D’Diere maachen um 19:30 Auer op. Tickete ginn et fir 10 € un der Oweskeess. Weider Informatiounen zum Concert erhaalt Dir op www.rockhal.lu.

Méi zur Band Pineway gitt Dir op Facebook, Instagram, Spotify a YouTube gewuer!