Prabbeli Wolz: E super Programm bis Enn 2020!

Fir seng nei Saison huet de Prabbeli zu Wolz e räichhaltege kulturelle Programm zesummegestallt. Vun Theater, iwwert Concerten, bis hin zu Workshops – an dat an de verschiddenste Beräicher a Stiler – fënnt Kleng a Grouss spannend Evenementer, fir den Honger no Kultur an Erliefnis ze stëllen.

Déi éischt Virstellung muer, um 22. Oktober 2020 mat „In einem unbekannten Land“ huet leider missen ofgesot ginn. Drécke mir d’Daumen, datt dës Palett un Evenementer stattfanne wäert:

• Droleg Natur
  Den 30. an 31. Oktober 2020 um 14:30, respektiv 14:00 Auer am Ciné Prabbeli
  Stil: Ciné-Concert
  Déi dräi animéiert Kuerzfilmer si voller Liichtegkeet an Ironie. D’Thema ass d’Natur, mat Haaptfiguren, déi grouss Erfindunge maachen an dobäi nach nei Frënn fannen. Déi beweegte Biller gi musikalesch begleet vum Florence Kraus a Grégoire Terrier.
  Ticketen: 10 € / 5 € < 26 Joer

• Mam Zuch an de Musée – Skulpturen aus verschiddenen Zäiten
  De 04.-05. November 2020 vun 10:00 bis 16:00 Auer an der Villa Vauban, dem MUDAM an dem Atelier Prabbeli
  Stil: Workshop
  Zesummen huele mir den Zuch vu Wooltz bis an d’Villa Vauban an an de Mudam a beschäftegen eis mam Thema Skulptur. Zesumme gi mir d‘Ausstellunge kucken a gestalten doropshin eis eege Skulptur am Atelier Prabbeli.
  Ticketen: Fräien Entrée

• Nomad (Schoulvirstellung)
  Den 13. November 2020 um 14:30 Auer am Brandbau
  Stil: Kannerconcert
  Kommt mat op eng musikalesch Weltrees mat der lëtzebuergescher Band NOMAD. Mir reese vun Argentinien iwwer Indien, vum Balkan bis an de Mëttleren Osten. Nom ofwiesslungsräiche Programm kënne mir dann de Museker Lächer an de Bauch froen. Des Concertsserie versprécht musikalesch Iwwerraschunge fir eis jonk Nolauschterer am altersgerechte Kader.
  Ticketen: 10 € / 5 € < 26 Joer

• Nomad
  Den 13. November 2020 um 20:00 Auer am Brandbau
  Stil: Concert
  Véier Museker huelen Iech mat op eng Odyssé un d’Grenze vun der Welt, den Zivilisatiounen an de Kulturen. Musek aus Argentinien, Indien, dem Balkan an dem Mëttleren Oste gräift de Lëtzebuerger Grupp NOMAD bei senger spannender Aventure op. Um Kontrabass fanne mir de Jeannot Sanavia, op der Klarinett de Sébastien Duguert, um Akkordeon a Bandoneon den Daniel Gruselle an ëm d’Perkussioun këmmert sech de Victor Kraus.
  Ticketen: 14 € / 7 € < 26 Joer (Oweskeess: 16 € / 9 €)

• Tête-à-Tête: Hände Hoch!
  De 26. November 2020 um 14:30 Auer am Brandbau
  Stil: Erzielunge fir Kanner mam Betsy Dentzer a Selma Scheele
  D’Erzielerinne Betsy Dentzer an d’Selma Scheele loossen sech et och dëst Joer net huelen an hirem Geschichterepertoire fir Kanner ze kromen. Si hu fir iech e puer immens béis Ganovinnen a Lausbouwen un d’Handschelle geluecht a wëllen si iech elo virféieren. Falls se net virdru schonn erëm fortgelaf sinn …
  Ticketen: 10 € / 5 € < 26 Joer

• Tête-à-Tête: Hände Hoch!
  Den 26. November 2020 um 20:00 Auer am Brandbau
  Stil: Erzielunge fir Erwuessener mam Betsy Dentzer a Selma Scheele
  „Mord ist der Wollust nah wie Rauch dem Feuer.“ sot schonn deemols de William Shakespeare. Ma da leeë mir mol lass! Nee, net mat morden, mee mat erzielen! Mir wäerten iech hannerrécks d’Ouere bluddeg erziele bis iech d’Hoer zu Bierg stinn – mat messerschaarfe Wierder, rätselhaften Anekdoten an äiskale Kriminalgeschichten. Mir hu Bludd geleckt a kënnen iech et net erspueren: eist genësserlecht batterbéist Blutgewinsel.
  Ticketen: 12 € / 6 € < 26 Joer (Oweskeess: 14 € / 8 €)

• Wiplala
  Den 28. November 2020 um 14:20 Auer am Ciné Prabbeli
  Stil: Kannerkino
  De siwejärege Johannes Blom ass ganz erstaunt, wéi hien e klenge Mann am Kicheschaf entdeckt, verstoppt hannert dem Afennossbotter. Nach méi iwwerrascht ass hie wéi e realiséiert datt dëse klenge Mann, de „Wiplala“, magesch Kraaft huet. D’Aventure fänkt sou richteg un, wéi de Wiplala déi ganz Famill verzaubert an si op eemol all ganz kleng sinn…
  Ticketen: 5 €

• Arthur Possing Quartet Feat. Thomas Mayade
  Den 28. November 2020 um 20:00 Auer am Brandbau
  Stil: Concert / Jazz
  Traditioun an d’Moderne gi gemëscht, wann den Arthut Possing Quartet eege Kompositiounen an eng Selektioun vun imprevisibele Stécker virdréit. Nodeems de Grupp sech 2013 gegrënnt huet ass den éischten Album „Four Years“ am Joer 2018 erauskomm.
  Ticketen: 14 € / 7 € < 26 Joer (Oweskeess: 16 €/ 9 €)

• Goldschmiedecours
  Den 4. Dezember 2020 vun 17:00 bis 20:30 Auer an de 5. Dezember 2020 vun 10:00 bis 17:00 Auer am Atelier Prabbeli
  Stil: Workshop iwwer 2 Deeg fir Erwuessener
  Ob opulent oder schlicht – zesumme mat dem Diana Prokot kënnt Dir Äre ganz eegene Bijou kreéieren, an dat vun der kreativer Gestaltung bis hin zu der handwierklecher Aarbecht mat verschiddenen Techniken a Materialien. Zesumme léiere mir d’Grondtechnike wéi Seeën, Feilen, Léiden a Béien.
  Präis: 80 €

• Pascal Schumacher
  Den 4. Dezember 2020 um 20:00 Auer am Brandbau
  Stil: Concert / Jazz
  De renomméierte Museker Pascal Schumacher sicht ëmmer no Neiem, nom Onerwaarten, nom Obekannten. Zu Wolz presentéiert hien säi Solo-Album „SOL“ mat engem perséinleche Programm an enger intimer Ambiance.
  Ticketen: 14 € / 7 € < 26 Joer (Oweskeess: 16 € / 9 €)

• L’Hiver féérique
  De 26. Dezember 2020 um 14:30 Auer am Ciné Prabbeli
  Schnéiflacke falen, Stäre glitzeren. Mat originellen Techniken an der traditioneller Animatioun gëtt e magesche Wanter am festlecher Stëmmung gebueden.
  Ticketen: 5 €

Ma, schonn elo kann ee sech och op d’Joer 2021 virfreeën. Um Programm sti beispillsweis Wolf & Moon (Elektro Folk aus Däitschland) um 16. Januar, Isle (Dream Pop aus Holland) um 13. Februar, Stärennuecht mat The Tame And The Wild (Indie Folk aus Lëtzebuerg) um 13. Mäerz an de Poetry Slam De Lux’ 11 um 3. Abrëll.

All weider Detailer fannt Dir op www.prabbeli.lu, sou wéi an der Borschür. Hei kënnt Dir och Är Sëtzplaz(e) reservéieren. Mir wënsche vill Spaass!