Safe to Serve: En neit Qualitéitszeeche fir Restauranten a Caféen

Wärend gëschter an der Stad Lëtzebuerg d’Terrassen nees opgemaach gi sinn, an ee virum Bistro beim Renert geprost huet, konnt an engems den neie Label Safe to Serve presentéiert ginn. Etablissementer vun der Horesca, déi un der Campagne deelhuelen, engagéiere sech fir d’Recommandatioune vun der nationaler Federatioun vun den Hotelieren, Restaurateuren a Cafetieren zu Lëtzebuerg ze respektéieren. An anere Wieder: Si garantéieren déi bescht Konditiounen bei der Reprise vun den Aktivitéiten.

Ënnerstëtzt gëtt d’Campagne vun der Tourismusdirektioun an der Direktioun vun de Mëttelstand vum Wirtschaftsministère, sou wéi vun der Handelskummer. Mat Safe to Serve ginn eng ganz Rei un Aktioune gruppéiert, déi d’Sécherheet a Gesondheet vum Personal an de Clienten zu all Moment garantéiere mussen. Vun 2.240 Etablissementer zu Lëtzebuerg sollen der scho ganzer 60 de Label droen, weider 120 hunn hir Demande eragereecht.

Generell mussen déi gastronomesch Strukturen d’Consignen vun der Horesca, déi an engem Guide zesummegefaasst gi sinn, berécksiichtegen an ëmsetzen. Fir de Label Safe to Serve ze kréie musse 4 onëmgänglech Kritären erfëllt ginn:

• Den Etablissement muss beim Kommissariat fir Qualitéit, Bedruch a Liewensmëttelsécherheet vun der Regierung enregistréiert ginn;
• D’Hygiènesmesuren an d’Prinzipien vum HACCP musse respektéiert ginn;
• D’Consignen vun der Regierung, fir der Pandemie entgéint ze wierke, musse respektéiert ginn;
• All noutwenneg Demarche mussen an d’Weeër geleet ginn, fir eng maximal Sécherheet vun de Clienten an dem Personal ze garantéieren (Sécherheetsofstand, d’Droe vun enger Mask,…).

De Minister fir Mëttelstand an Tourismus Lex Delles © Martine de Lagardère/moien.lu

Gläichzäiteg wäert d’Horesca verschidde Moossnamen asetzen, fir esou d’Visibilitéit vun den Etablissementer, déi de Label droen, ze stäerken:

• Blo Autocollanten an der Entrée, respektiv an der Fënster, sollen dem Client direkt weisen, datt de Restaurant, Café oder Hotel un der Campagne Safe to Serve deelhëlt;
• StS-Participanten kréien och kleng Tafele fir op d’Dëscher ze setzen, sou wéi Affichen zur Verfügung gestallt;
• Zesumme mat e puer Schutzmasken ginn dës Gadgeten an engem Kit verdeelt.

De Minister fir Mëttelstand an Tourismus Lex Delles huet dobäi betount, datt „Caféen a Restauranten Plaze vun der Renconter sinn, déi wichteg fir dat soziaalt Liewe sinn. Si sinn Deel vun der nationaler Identitéit a profitéieren vun engem exzellente Ruff, dat och iwwert d’Grenzen hannenaus.“ D’Reouverture vu Caféen a Restauranten gouf net nëmme vum Secteur, mee och vun de Bierger bänzeg erwaart.

D’Participatioun un der Campagne Safe to Serve ass gratis fir all Memberen vun der Horesca. Weider Informatiounen dozou ginn et op www.horesca.lu.

Opmaacherfoto: (v.l.n.r.) Carlo Thelen, CEO vun der Handelskummer; Alain Rix, HORESCA-President; Lex Delles, Mëttelstandsminister; François Koepp, HORESCA-Generalsekretär. © Martine de Lagardère/moien.lu