Elo ass de Moment: D’Broschür fir eng sécher Pensioun!

All Persoun sollt d’Recht op eng sécher Pensioun hunn an dës och un déi aktuell Situatioun an zukünfteg Besoinen upasse kënnen. Aus dësem Grond huet de Romain Schneider, Minister fir sozial Sécherheet, gëschter déi nei moderniséiert Broschür mat allen noutwennegen Informatiounen, wéi ee seng Pensiounsversécherung completéiere kann, presentéiert.

Verännerunge gehéieren zum Liewen. An enger Gesellschaft, déi sech rapid weider entwéckelt an ëmmer nees verännert, muss och d’Sozialversécherung sech upassen, fir esou Verbesserunge bei der Pensioun ze erzilen. Dobäi muss een och den individuellen a spezifesche Besoine vun de Versécherte Rechnung droen.

Huele mir d’Beispill vun enger Mamm hir Aarbecht reduzéiert, respektiv temporär ganz opgëtt, fir sech doheem ëm hiert Kand ze këmmeren. Déi nei Informatiounsbroschür erkläert all Persoun, wéi een d’Pensioun am Beschten un déi eege Situatioun upassen an esou spéider gréisstméiglech dovu profitéiere kann. „Ech hoffen, datt jiddwereen déi Moossnam fënnt, déi zu sengen aktuelle Liewensëmstänn a sengen zukünftege Besoine passt“, ënnersträicht de Romain Schneider.

(v.l.n.r.) Fernand Lepage, President vun der CNAP,; Danielle Becker-Bauer, Presidentin vum CNFL; Romain Schneider, Minister fir sozial Sécherheet; Claude Seywert, President vum CCSS © Ministère fir sozial Sécherheet

Bei der Broschür Elo ass de Moment, fir Är Karriär bei der Pensiouns-Versécherung ze completéieren! geet een op folgend Froen an:

• Dir gitt Är berufflech Aktivitéit op, wëllt awer weider pensiounsverséchert bleiwen?
• Dir hutt Är berufflech Aktivitéit reduzéiert a wëllt Är Affiliatioun bei der Pensiounsversécherung completéieren?
• Dir hutt an der Vergaangenheet Är berufflech Aktivitéit aus familiäre Grënn reduzéiert oder opginn?
• Dir hutt Iech virun 1991 Cotisatioune rembourséiere gelooss a wëllt dës Perioden nees nei abezuelen?
• Dir hutt wärend Ärem Bestietnes Är berufflech Aktivitéit reduzéiert oder opginn a gitt op der Basis vum Zerrüttungsprinzip gescheet?

D’Broschür gëtt op Lëtzebuergesch, Däitsch, Franséisch, Englesch a Portugisesch ugebueden. A physescher Form kann ee säin Exemplaire beim Ministère fir sozial Sécherheet, bei der nationaler Pensiounskeess, dem Zentrum fir sozial Sécherheet an dem nationale Rot vun de Lëtzebuerger Fraen a Gemenge kréien. Déi digital Versioun fannt Dir op mss.gouvernement.lu, www.cnap.lu, www.ccss.lu an www.cnfl.lu.