Wa jonk Berliner net wëssen, ëm wat et geet

Tag der Deutschen Einheit - méi wéi just ee symboleschen Dag

vun Kelly Scholtes den 04/10/2019

Wa jonk Berliner net wëssen, ëm wat et geet

Berlin – Den 3. Oktober gouf a ganz Däitschland den Tag der Deutschen Einheit gefeiert. Fir eis däitsch Noperen ass et ee gesetzleche Feierdag. Mee wat genau symboliséiert deen Dag iwwerhaapt an firwat gëtt en gefeiert?

Een uerdentlech Stéck Geschicht ass gëschter nees a ganz Däitschland gefeiert ginn. Den 3. Oktober erënnert een sech un d’Opléisung vun der Däitscher Demokratescher Republik (DDR) an de fräien Zougang zur Republik Däitschland (West-Däitschland). Méi prezis handelt et sech ëm den Dag vun der Wiedervereenegung. Den Tag der Deutschen Einheit ass domadder säit 1990 en Nationalfeierdag.

Mulitmediashow „Dem Deutschen Volke“ © Kelly Scholtes

Ma och an der däitscher Haaptstad Berlin gouf den historeschen Dag grouss gefeiert. Zum 29. Joresdag vun der Däitscher Eenheet ginn nach bis den 5. Oktober zeg Attraktioune gebueden. Virun allem virum Reichstag, sou wéi och an der Strooss vum 17. Juni, direkt beim Brandenburger Tor, fënnt ee klengt Biergerfest statt. Ënnerschiddlech Artisten aus den Beräicher Comedy, Musek, Konscht, Poetry-Slam an Theater trieden op a bidde Grouss a Kleng eng kulturell Diversitéit un.

Vill Leit hunn dësen 3. Oktober grouss gefeiert. Muncher een ass allerdéngs einfach frou, ee feste Feierdag am Joer ze hunn a verbënnt näischt Besonnesches mat dësem historeschen Dag. Esou huet beispillsweis een 25 Joer jonke Student zouginn, datt hien den 3. Oktober eigentlech nach ni anescht wéi een normale fräien Dag erlieft huet. An dat, obwuel hien a Westdäitschland, e puer Joer no der Wiedervereenegung, gebuer ginn ass. Eréischt duerch säi Studium an Bekanntschaften huet hien sech schliisslech méi mam Thema beschäftegt.