Festival de Wiltz an Héichform: De Line-Up ass komplett!

De Line-Up vum renomméierte Festival de Wiltz, den an dësem Joer vum 26. Juni bis de 16. Juli am Amphitheater um Fouss vum Wëlzer Schlass stattfanne wäert, ass elo komplett. Gëschter gouf als leschten Act déi US-amerikanesch Sängerin LP an de Programm opgeholl. De Festival de Wiltz bitt ab elo Early-Bird-Ticketen fir de Concert vun der Indie-Rock-Sängerin aus New York un, déi mat hirem Hit „Lost on You“ den internationalen Duerchbroch erlieft huet.

De Summer ass net méi wäit! 2022 presentéiert de Festival de Wiltz sech nees mat engem héichkarätege Line-Up am groussraimege Fräiliichtzelt am Amphitheater virun der Kuliss vum pittoreske Wëlzer Schlass.

E Mëttwoch gouf LP fir de Festival ugekënnegt – eréischt viru kuerzem ass mat der Operette „Die lustige Witwe“ vum Theater Tréier e richtege Klassiker als neie Programmpunkt opgeholl ginn. De ganze Line-Up liest sech wéi eng Rees duerch d’Museksgeschicht vun de leschte Joerzéngten.

Mando Diao, Passenger an d’Gipsy Kings wäerten an dësem Joer op der Bün stoen. Mam „Dschungelbuch“ als Musical fir Kanner an engem Galaconcert vun der Weeltzer Musek gëtt de Programm ofgerënnt.

Den traditiounsräichen Open-Air-Festival zelebréiert an dësem Joer scho säi 70. Gebuertsdag a gehéiert esou zu engem vun den erfollegräichste Festival zu Lëtzebuerg sou wéi der gesammter Regioun. All Infoen an Ticketen zu de Covid-Check-Events ginn et op festivalwiltz.lu.

Dernières nouvelles