Et brauch nees verstäerkt Grenzkontrollen

Am Kontext vun der 4. oder 5. Covdi19-Infektiounswell, jee no Land, kënnt et nees zu Kontrollen am Grenzberäich. Dës Kéier sinn et net eis däitsch Noperen déi den Ufank maachen, déi hunn nach keng Regierung, mee dem Emmanuel Macron säi Frankräich. Et geet heibäi net ëm d‘Aschränkung vun der Beweegungsfräiheet, mee ëm d‘Incitatioun zur Impfung.

Zanter haut 22. November – jo si hätten sech eppes éischter zu Wuert melle kënnen – kann een als Lëtzebuerger net méi einfach esou mir näischt, dir näischt déi franséisch Grenz iwwerschreiden. Also streng geholl schonn, mee nëmmen da wann ee entweder: geimpft ass, voll a ganz geheelt an/oder ee PCR-Test – dee muss manner wéi 24 Stonnen al sinn – an der Täsch huet. Et leeft also…

Als Grond gëtt Paräis un, datt Lëtzebuerg op der Lëscht vun de Länner seet, déi ënner Observatioun stinn. Op dëser Lëscht sti weider: Belsch, Bulgarien, Däitschland, Éisträich, Estland, Griicheland, Holland, Irland, Kroatien, Lettland, Litauen, Rumänien, Slowakei, Slowenien, Tschechien an Ungarn. Ausgeholl vun der Reegel si Persounen ënner 12 Joer an et gëtt nach Besonneschkeeten.

Esou heescht et säitens der franséischer Regierung, datt déi verschäerften Areesreegelen net gëllen, falls den Openthalt am Hexagon manner wéi 24 Stonne bedréit, awer nëmmen da wann een manner wéi 30 Kilometer vum besichten Zil ewech wunnt. Dir verstitt dat net? Mir och net, jo net emol de frëndleche franséischen Douanier, vun deem mir dozou Eenzelheete wësse wollten.

Dernières nouvelles