D’ULC kritiséiert déi drastesch Präiserhéijunge bei de Versécherungsprimmen

No de wëchentleche Steigerunge vun den Energiepräisser, sinn et elo déi drastesch Erhéijungen vun de Versécherungsprimmen fir d’Wunnengen. Esou munch Haushalten hunn an de vergaangene Woche beim Studéiere vun hire Versécherungsprimme fir d’Wunnengen net schlecht gestaunt, datt dës ëm 15% an nach méi an d’Héich geschoss sinn.

An dësem Zesummenhang kritiséiert d’ULC, datt dës Erhéijung a vëlleger Ontransparenz an ouni Ukënnegung am viraus un de Client geschitt ass. Sécherlech kann d’ULC novollzéien, datt opgrond vun den enorme Schiet un de Wunnengen duerch d’Naturkatastrophen zousätzlech Käschten fir d’Versécherungsgesellschaften entstane sinn. Mee ob d’Präissteigerungen an dëser Héicht ze rechtfäerdege sinn, ass op mannst zimmlech zweiwelhaft?!

Dobäi kënnt, datt d’Gesellschaften an de vergaangene Joren opgrond vun ausgezeechente Resultater d’Méiglechkeet haten, genuch Récklagen virzehuelen.

Net novollzéibar ass fir d’ULC och, datt sech verschidde Responsabele vun de Versécherungsgesellschaften zu der Argumentatioun hiräisse loossen sech just op déi fräi Maartwirtschaft ze beruffen. Esou eng Haltung seet alles iwwert d’Mentalitéit an de professionellen Ëmgang mam Client aus.

Well och an enger fräier Maartwirtschaft aknn de Staat ganz wuel reguléierend agräifen, wann et ëm dat existenziellt Wuel an d’Existenz schlechthinn vun de Biergerinnen a Bierger geet. Et gëtt nämlech genuch negativ Beispiller, wouhin de Wee féiere kann, berufft ee sech just op de fräie Wettbewerb vum Maart.

An dësen Zäitpunkt ass aktuell erreecht, wëlle mir net datt sech nach méi Haushälter an d’Aarmut beweegen, bezéiungsweis sech nach weider verschëlden an an Aarmut liewe mussen, wärend sech anerer iwwert stattlech ausgezuelten Dividenden erfreeë kënnen.

Fir d’ULC ass d’Zäit méi wéi räif, an d’Zäit wou een et just zu Kenntnis hëlt eriwwer. Well nieft den drastesch geklommenen Energiepräisser sinn et elo d’Versécherungsprimmen, fir déi Wunnengen an och fir d’Gefierer. Heizou kommen Präiserhéijung bei Liewensmëttel, verschidden Déngschtleeschtungen, Taxen sou wéi anere Materialien a Réistoffer, déi villen Haushälter d’Liewe schwéier maachen.

Dofir fuerdert d’ULC d’Versécherungsgesellschaften op, dës Tariferhéijung sozial ofzefiederen an net integral un de Client ofzewälzen. Dës Weidere verlaangt d’ULC eng absolut Transparenz an der Tarifpolitik. Amplaz d’Clienten viru vollend Tatsaachen ze stellen, sinn si an Zukunft fréizäiteg genuch iwwert bevirstoend Präissteigerungen ze informéieren.

Weider huet sech och d’Regierung bis ewell net onbedéngt Luef verdéngt an oft nogekuckt ouni eppes ze ënnerhuelen, wat et ëm déi alldeeglech reell Problemer vun de Mënsche geet. Well sech ëm d’Suerge vu Mënsche këmmeren, heescht Pro Actif handelen.

Dofir besteet d’ULC dorop, datt d’Regierung och bei de Versécherungsprimme kuerzfristeg eng Deckelung virgesäit, sou wéi de Konsumenteschutz dat scho bei den Energiepräisser gefuerdert huet. Well d’Präisspiral dréit sech ëmmer weider, an den Endverbraucher ass schliisslech deejéinegen, deen ëmmer nees de Portmonnie dierf opmaachen.

Matgedeelt vun der ULC

Annexe:

Dernières nouvelles