Accident a Brand am Tunnel Markusbierg: De CGDIS trainéiert den Eeschtfall

Gëschter hunn de CGDIS, zesumme mat der Police, der Ponts et Chaussées an der ITM eng gréisser Übung am Tunnel Markusbierg gehat. Am Fall vun engem Accident an engem domat verbonnene Brand an „ënnerierdesche Verkéiersanlagen“ sollen d’Rettungsdéngschter effikass agräifen a schnell Hëllef bidde kënnen.

„Dësen Exercice, dee gesetzlech virgeschriwwen ass, déngt dozou déi verschidde Prozedure vun der Alerte vun de Rettungsdéngschter iwwert d’Zesummenaarbecht vum CSU 112 mam CITA vun der Ponts&Chaussées bis hin zu den technesche Sécherheetsinstallatiounen am Tunnel selwer ze testen“, erkläert de CGDIS.

Ënnert reale Konditioune gouf wärend dem ganzen Dag d’Standart-Taktik an den Oflaf vun dësem Zeenario getest. D’Erfarung ass net nëmmen nëtzlech bei engem Virfall an engem (Autobunns)Tunnel, mee och an engem ënnerierdesche Parking.

E Sécherheetsexercice vun dëser Aart muss all Joer trainéiert ginn.

Galerie © CGDIS