Wanteraktioun 2018/2019: Ee Réckgang an alle Beräicher!

Säit 2001 organiséiert d’Lëtzebuerger Regierung all Joer d’Hëllefaktioun am Wanter, bei der bedierfteg Persounen an der kaler Joreszäit net nëmmen ee waarme Maufel, mee och een Daach iwwert dem Kapp ugebuede kréien. Esou sollen si bei Minustemperature virum Erfréiere geschützt ginn.

Zesumme mat Inter-Actions, dem Lëtzebuerger Roude Kräiz a Caritas huet den Integratiounsministère d’Wanterorganisatioun op d’Been gestallt. Weider Organisatiounen, déi mat bedeelegt waren an ee grousse Merci verdéngt hu sinn: Rout Kräiz-Doheem Versuergt a säi Service fir Flüchtlingen, d’Stëmm vun der Strooss, d’Vollekskichen, d’Jugend an Drogenhëllef, Femmes en Détresse, d’Doktere vun der Welt, d’Lëtzebuerger Police, OLAI, den Ausseministère, de Gesondheetsministère, den Transportministère, CFL, AVL, d’Stad Lëtzebuerg – Service Incendie et Ambulances an d’Stad Esch-Uelzecht – Foyer Abrisud. Heibäi huet, wärend de Wanterméint, de Foyer Abrisud véier Noutfallbetter zur Verfügung gestallt.

Dagesfoyer

Beim Dagesfoyer waren eng 60 Fräiwëlleger domat beoptraagt, Iessen unzebidden. Donieft ass och am sozio-pedagogesche Beräich Hëllef ugebuede ginn, wéi beispillsweis beim Opstelle vun engem CV. Nieft artisteschen Atelieren an anere lëschtegen Aktivitéiten ass och een Entspanungsatelier offréiert ginn. Dobäi hunn 227 Persoune vum Roude Kräiz senge Vestiaire profitéiert, wou bedierfteg Leit nei Kleedung kritt hunn. 34 fräiwëlleg Infirmieren an 3 Dokteren hunn hire Service gratis ugebueden. Wärend 136 Stonnen hunn 95 Persounen dovu profitéiert.

Hei e puer weider Schlësselzuelen:

• Deeg, un deenen de Foyer op war: 121
• Total u Persounen am Foyer: 17.234 fir 2018/2019 (- 1.883 Persounen 2017/2018)
• Dovun 92,98% Männer an 7,02% Fraen
• Dovun 10,43% Lëtzebuerger, 45,06% aus aneren EU-Länner a 44,51% aus engem Drëttstaat

Nuetsfoyer

D’Better huet hei d’Caritas um Findel ugebueden. Heibäi hu sech 74 Fräiwëlleger ëm d’Gestioun gekëmmert an 3 bis 4 Persounen hu sech ëm d’Ausdeele vu Klengegkeete fir ze iesse bekëmmert. Och hei sinn d’Zuelen zeréck gaangen:

• Deeg, un deenen de Foyer op war: 128
• Total u Persounen am Foyer: 14,192 fir 2018/2019 (-657 Persounen 2017/2018)
• Total u Persounen am Foyer Abrisud: 773 fir 2018/2019 (-100 Persounen 2017/2019)
• Total u Persounen am Foyer Abrisud op Noutfallbetter: 230 Persounen 2018/2019 (+96 Persoune fir 2017/2018)
• Dovu 94,05% Männer an 5,95% Fraen am Nuetsfoyer, 89,74% Männer an 10,26 % Fraen am Foyer Abrisud
• Dovun 6,86% Lëtzebuerger, 48,53% aus aneren EU-Länner a 44,61% aus engem Drëttstaat (Nuetsfoyer) – 43,59% Lëtzebuerger, 41,03% aus aneren EU-Länner a 15,38% aus engem Drëttstaat (Foyer Abrisud)
• 18,43% haten tëscht 16 a 25 Joer, 53,83% haten tëscht 26 a 45 Joer, 26,25% tëscht hate 46 Joer a 65 an 1,24% méi wéi 65 Joer. Dovu waren 0,25% Mannerjäreg an op mannst vun engem Elterendeel begleet.

Weider detailléiert Zuele fannt Dir HEI.