Weltdag ouni Tubak – T’ass ni ze spéit opzehalen!

Den Tubak steet weltwäit op der éischter Plaz vun de fréizäitegen a vermeidbaren Doudesfäll. Ronn 8 Millioune Mënsche stierwen all Joer un de Suitte vum „Genoss“, dovunner sinn der 1,2 Milliounen onfräiwëlleg dem Damp ausgesat. Eleng zu Lëtzebuerg ziele mir ëm 1000 Doudeger, déi u Krankheete gestuerwe sinn, déi mam Tubakskonsum a Verbindung stinn. 80 Persounen sinn dovunner passiv Fëmmerten.

Zum Weltdag ouni Tubak relancéiert d’Santé nees seng Sensibiliséierungscampagne, déi ënnert anerem op Longekrankheeten opmierksam mécht. Donieft geet den Appell un d’Fëmmerten eraus, fir de Konsum ze reduzéieren oder, am beschte Fall, ganz opzehalen. Heivir gi speziell Programmer ugebueden, fir vun der Drog ewech ze kommen.

D’Longen als liewesnoutwenneg Organer

Fir eis Gesondheet an eist Wuelbefanne spillen d’Longen eng essentiell Roll. Net nëmme versuerge si eise Kierper mat Sauerstoff – esou maache si och alldeeglech Beweegungen, wéi goen, lafen oder einfach wibbelen, méiglech. D’Suitte vum Tubak op eis Longe sinn dobäi dramatesch:

• 90 % vum Longekriibs kënnt duerch Tubakskonsum;
• Méi wéi 80 % vun de chronesche Longekrankheete komme vum Tubakskonsum. Ënnert anerem gëtt esou och Asthma verschlëmmert;
• Aner Kriibszorten, sou wéi Zongen- oder Kehlkappkriibs kënne resultéieren;
• Och mat Infektioune vun den Otemweeër kann ee rechnen. Virun allem Kanner, déi dem Damp ausgesat sinn, leider ëfters ënnert enger Bronchite, enger Longen- oder Mëttelouerentzündung, respektiv Asthma;
• Eng latent Tuberkulos kann ausbriechen.

Duerch déi aktuell sanitär Kris dierf een Otemproblemer, an domadder och d’Suitte vum Tubakskonsum net vernoléissegen. Där Meenung ass och d’Weltgesondheetsorganisatioun (WHO), déi ugëtt, datt Fëmmerten eng schlëmmer Form vun der Covid-19-Erkrankung entwéckele kënnen, wéi Net-Fëmmerten. Donieft klëmmt de Risiko vu Komplikatioune bei der Behandlung vum Virus.

D’Ausso, datt den Nikotinkonsum de Risiko u Covid-19 ze erkranken erof schrauwe géif, wëll een net bestätegen. Aktuell géif et heivir kee wëssenschaftleche Beweis ginn.

© Ray Reyes / Unsplash

Ophalen ass an all Alter méiglech a sënnvoll

Schonn 48 Stonnen nom Ophale mat Fëmmen kritt de Kierper nees méi Sauerstoff an d’Ootemfunktioun verbessert sech. Gutt ee Joer nom Ophalen ass d’Ootmung nees an engem normalen Zoustand an de Risiko een Häerzinfarkt ze kréien, geet ëm d’Halschent erof. De Risiko u Longekriibs ze erkranke geet no 10 Joer ouni Tubak ëm d’Halschent zeréck, an 20 Joer méi spéit ass een um selwechten Niveau wéi een Net-Fëmmert.

Wien ophält, gëtt net eleng gelooss. Am Joer 2008 huet de Gesondheetsministère zesumme mat der CNS ee Programm opgestallt, fir esou Persounen ze encouragéieren, déi mam Fëmmen ophale wëllen. Déi medikamentéis Traitementer ginn zum Deel vun der Santé zeréckbezuelt an eng professionell Begleedung kann een och zur Säit gestallt kréien. Weider Informatiounen dozou ginn et op www.tabac-stop.lu.

An dësem Kader huet d’Fondation Cancer een interessanten Interview mat fréiere Fëmmerten gefouert a si gefrot, wéi et war, fir opzehalen. Dës Gespréicher fannt Dir HEI.

Opmaacherbild: © Amritanshu Sikdar / Unsplash