Weltdag vum Diabetis: Wéi virbeugen, behandelen an domat ëmgoen?

Fir gréisser Komplikatiounen a Risiken ze verhënneren, ass Virsuerg an Erkennung een essentielle Schrëtt, egal wéi eng Krankheet thematiséiert gëtt. Passend zum Weltdag vum Diabetis, deen all Joer de 14. November stattfënnt, huet de Gesondheetsministère, a Kollaboratioun mat der Lëtzebuerger Diabetis Associatioun (ALD) een Appell zur Sensibiliséierung zum Depistage vum Diabetis lancéiert.

Zënter 1980 huet d’Zuel u Persounen, déi un Diabetis leiden, sech quasi vervéierfacht. Dës extrem Erhéijung ass ze erklären duerch Iwwergewiicht, Fettsucht an kierperlech Inaktivitéit. Eleng zu Lëtzebuerg liewe 25.000 Persoune mat der chronescher Stoffwiesselerkrankung, déi sech duerch een dauerhaft erhéichte Bluttzockerspiggel äussert. An de meeschte Fäll handelt et sech dobäi ëm den Typ 2, deen duerch déi grad genannte Grënn ausgeléist gëtt, an net duerch eng Autoimmunerkrankung wéi beim Typ 1.

„Wa mir d’Viruschreide vun dëser Krankheet, virun allem beim Diabetis Typ 2, verhënnere wëllen, musse mir eis alldeeglech Gewunnechten iwwerdenken, wat dann heescht eng gesond Ernierung ëmzesetzen, reegelméisseg kierperlech Aktivitéiten auszeüben, een Normalgewiicht ze halen an mat fëmmen opzehalen“, sou de Gesondheetsminister Étienne Schneider.

Bei engem vu véier Erwuessene gëtt den Diabetis Typ 2 net festgestallt an domat och net behandelt. En fréizäiteg Erkennung dréit dozou bäi, datt duerch eng passend Behandlung schlëmmer Komplikatiounen a käschtespilleg Agrëff verhënnert kënne ginn. Dobäi sollt gewosst sinn, datt déi chronesch Erkrankung net heelbar ass, mee just traitéiert a kontrolléiert ka ginn.

Duerch ee Manktem oder ee Feeler beim Ausschëdde vum Hormon Insulin kann de Kierper den Zocker net als Energiequell notzen. Ass dat de Fall kann een d’Erkrankung am Blutt noweisen. D’Net-Behandele vum Diabetis ka sech am schlëmmste Fall spéider duerch een Häerzinfarkt, Erkrankunge vun de Koronararterien, Niereninsuffisenz oder och Verstoppung vun den Arterien äusseren.

D’Famill an den Diabetis

Scho fir eng zweete Kéier gesäit déi internationale Federatioun vum Diabetis (FID) mam Thema „D’Famill an den Diabetis“ fir, déi wichteg Roll vun der Famill am Zesummenhang mat der Erkrankung ervirzehiewen. Dat geschitt op 3 Niveauen:

1. D’Preventioun vum Diabetis Typ 2
   Vill Fäll vun Diabetis Typ 2 Fäll (70%) kënnen duerch ee gesonde Liewensstil verhënnert ginn. D’Risike fir all Familljemembere kënnen direkt Doheem reduzéiert ginn.
2. D’Fréierkennung vun der Erkrankung
   Kennt een d’Virwarnzeechen an d’Symptomer vum Diabetis, da sollt een als Betraffenen oder Familljemember reagéieren, sou datt den Diabetis schnell erkannt an traitéiert ka ginn. Ee fréien Diagnostik mat der passender Behandlung sinn essentiell fir gréisser Problemer ze verhënneren.
3. D’Ëmgoe mam Diabetis
   Leit een un Diabetis, da muss ee sech all Dag drëm këmmeren. Ee reegelméissege Suivi a gesonde Liewensstil, sou wéi eng stänneg Weiderbildung gehéieren dozou. Duerch dat néidegt Wësse kënnen och Familljememberen d’Erkrankung besser kenneléieren an esou déi betraffe Persoun am Alldag ënnerstëtzen.

Informatiouns- a Sensibiliséierungsdeeg: Lëtzebuerg ass aktiv

Fir d’Ëffentlechkeet unzezéien an d’Bierger zum Thema ze informéieren, sief et zur Preventioun, dem Traitement oder der Gestioun, organiséieren de Gesondheetsministère, d’ALD, d’Lëtzebuerger Societéit vun den Diabetologen (SLD) an déi 4 Klinike vum Land ganzer dräi Informatiouns- a Sensibiliséierungsdeeg. Um 7., 9., a 14. November gëtt ee mat diversen Aktioune méi zum Depistage vum Iwwergewiicht, der Fettsucht an dem Diabetis gewuer. Dank dem Froebou „Findrisk“ an dem Moosse vum Zockerwäert am Blutt kann den Diabetisrisiko ausgerechent ginn.

• Donneschdes, de 7. November
  • Nationale Gesondheetsdag an der City Concorde mat 25 Informatiounsstänn
• Samschdes, den 9. November
  • Solidaritéitsmarsch „10.000 Schrëtt géint den Diabetis“ zu Lénger
    Départ: Centre Sociétaire zu Lénger
    Heibäi handelt et sech ëm eng Sensibiliséierungsaktioun mat der Promotioun vu kierperlecher Aktivitéit, enger gesonder Ernierung an dem Traitement vum Diabetis Typ 2. D’Aktivitéit gëtt organiséiert a Kollaboratioun mat der FLMP am Kader vu „Gesond iessen, Méi beweegen“.
    Parcourse vu 5 an 10 Kilometer ginn organiséiert, sou wéi och de Familljerallye „Diabetes Go!“ um Parcours vu 5 Kilometer.
    Donieft kënnen all Participante vum Fitness-Buffet profitéieren, sech informéieren an hiren Diabetisrisiko ausrechne loossen.
  • Depistage vum Diabetis am Centre Hospitalier Emile Mayrisch (CHEM)
  • Depistage vum Diabetis am Kulturzentrum Opderschmelz zu Diddeleng wärend der Matinée Santé vu 9:00 bis 13:00 Auer
• Donneschdes, de 14. November (zum Weltdag vum Diabetis)
  Konferenzen, Atelieren an Informatiounsstänn vu verschiddene Firmen zum benéidegt Material (Pen, Pompelen,…), Moosssystemer vum Zocker an anert wichtegt Material zum Traitement, der eegener Kontroll an der Fleeg vum Patient.
  • Zu Ettelbréck a Wolz (ChdN) vun 13:00 bis 17:00 Auer
  • La Belle Etoile vun 11:00 bis 15:00 Auer mat Ateliere vun de Robert Schuman Spideeler
  • Amphitheater vum CHL vu 17:00 bis 19:00 Auer: Konferenz-Owend „Autour du 7“ mat der Presentatioun vu 7 Punkten a 7 Minutte fir d’Erkrankung besser ze verstoen

Weider Informatiounen zum Diabetis a Recommendatioune vun der FID an der WHO ginn et ënnert www.sante.lu, www.ald.lu, www.idf.org, www.worlddiabetesday.org.